Helgrilla gris – dette må bli tradisjon

I sommar prøvde me helgrilla gris for andre gong. I fjor fekk me grisen stima først, då det skal korte ned grilltida til det halve. Både me og gjestene syntes det vart vel mykje “sommerkotelett-smak” av den, så i år ville me prøve å grille den frå heilt rå tilstand. Då har me meir kontroll på smaken.

Det angra me ikkje på. Kjøtet vart heilt utmerka steikt, og smaken var … nominom!

Grisen var 24 kilo tung ferdig slakta. Me har høyrd at slaktevekta på grisen er omlag halvparten av levande vekt. Når alle 34 munnane hadde ete seg mette, var det framleis litt kjøt att på grisen + litt oppskåre. Me kunne altså gjerne metta fem-seks til på denne helgrilla grisen

Slik gjekk det til

Her er ei trinn for trinn-forklaring på korleis me gjekk fram når me skulle helgrilla gris:

Dag 1: Tok grisen opp av frysaren om kvelden og la han til tining i kjellaren over natta.

Dag 2: Tok grisen inn på kjølerommet og let han tine ferdig der. Me la grisen oppi ein bademadrass som berre var blåst opp på kantane. Då slapp med søl av kjøttkraft og marinade.

Bonden og grisen
Bonden har ei lita grilløkt før stiing om morgonen.

Dag 3: Grisen var tint, og me kunne prøve oss med litt marinade. Kunne nok tatt opp grisen eit døgn seinare, med andre ord. Slo ein marinade med halvt om halvt med øl og smelta smør oppi buken. I marinaden hadde me ymse krydder, mest kvitlauk og røykt paprikapulver.

Dag 4: Helgrilla gris

  • 06:00 – vi fyrte opp grillen. Me har ein stor grill med to kammer og lokk. Me fylte ein pose grillkol i kvart kammer og tente opp.  Så slo me folie rundt grillrista, ca to lag heile vegen. Medan grillen varma seg opp tok me grisen ut og la han på magen på grillrista. Der ruta me svoren med ein skarp og god kniv. Me såg at grisen vart litt for lang, så bonden skar av nedste del på bakbeina på han. Desse la me på sida av skroget. Me sette ein temperaturmålar i skinka og ein i nakken på grisen.
  • Me var nok litt raske med å legge grisen på, så grillen daua ut for oss eit par gonger. Sirka klokka 7 hadde me skikkeleg gong på han. Me hadde lokket igjen heile tida. Somme gonger gjekk det ikkje heilt igjen (pga mursteinen), men det var alltid på.
  • Om lag ein gong i timen slo eg marinade over grisen.
  • Ca klokka 10 var midtstykket begynt å bli godt steikt. Då la me murstein under rista midt på, slik at me fekk løfta stykket litt vekk frå varmen. Me fylte også på med grillkol (ein sekk fordelt på begge kammera).
  • På eit tidspunkt følte me at det vart litt daudt i grillen. Då lirka me vekk litt folie i begge endar av rista.
  • Klokka 13 fylte me på med meir grillkol.
  • I 17-tida kom det eit par regnskurer. Følte ikkje at det gjorde noko til eller frå på grillen. Då hadde bakparten nådd 76 grader for ei stund sidan, som var dit me ville.
  • Kl 18.45 var heile grisen 76 grader. Me let han ligga på grillen til servering. Det var lite gang i grillen på det tidspunktet.

Tilbehøret:

Me fekk begynt matserveringa 19.15, og då var kjøtet skikkeleg bra. Til kjøtet hadde me steikte poteter (sjølvsagt, me er jo både grise- og potetbønder :)), couscous-salat og dressing med rømme/creme fraiche, eplebitar og sennep.

grilleklar gris
Ei delvis punktert strandmadrass kom godt til nytte.
På grillrista
To lag med folie rundt heile grillrista. Då slepp du at fettet og marinaden renn nedi grillen og tek fyr. Svoren vart ruta godt før steiking.
Grisen med steiketermometer.
Me hadde tre termometer i frå starten, men droppa det i midten ganske fort. Det gjekk nesten gjennom kjøtet.
Bonden gjekk for å stelle dyra, medan bondekona vart sittande att og vakte grillen. Klokka sju kom eit gildt bondebarn med frukost til ho som ikkje ville gå frå grillen!
Grillen vår
Me hadde lokket igjen heile vegen. Det er ventil på begge sider av grillen.
Litt uti grillinga
Klokka er 10, grisen har ligge på i 3,5 timar og er allereie brun og fin.
42 grader på grisen
Klokka 11 er me oppe i 42 grader. Me skal til 76. Gjestene er inviterte til klokka 19. Går regnestykket opp, lurer me på.
62 grader på grisen
Skjønt, klokka 11 er bakstykket oppe i 62 grader.
Påfyll av grillkol
Klokka er 13 og me fyller på med grillkol.
Grillvottar
Grillvottane var uvurderlege ein slik dag. Heldigvis har me rist med handtak, i tillegg.
Bonden serverer helgrilla gris
Klokka er 19.15 og bonden skal servere helgrilla gris til seg, kona og 32 svoltne gjester.
Det ferdige måltidet
Svinekjøtt med couscous-salat, eple- og sennepsdressing og potetbåtar.

Legg att eit svar

Epostadressa di blir ikkje synleg. Påkravde felt er merka *

Denne nettstaden brukar Akismet for å redusere søppelpost. Lær korleis kommentarane din vert handsama.